«44 օր սրանք մեզ կերակրել են էսպիսի կտերով, ու մենք էլ կույր հավերի նման կերել ենք էդ կտերը» Հովհաննիսյանը՝ իր հասցեին հնչող մեղադրանքների մասին

Քրեական գործերով փաստաբան Վահան Հովհաննիսյանը «Ֆեյսբուք»-ում գրառում է կատարել, որում անդրադարձել է ռազմական տեսաբան, Պաշտպանության նախարարության նախկին աշխատակից Արծրուն Հովհաննիսյանին, որը, հիշեցնենք, 2020 թվականի սեպտեմբերի 27-ից նոյեմբերի 9-ը տեղի ունեցած արցախա-ադրբեջանական պատերազմի ժամանակ ղեկավարում էր «Հայկական միասնական հարթակ» կենտրոնի ամենօրյա մամուլի ասուլիսները, ներկայացնում Հայաստանի պաշտոնական տեսակետը։

«44 օրյա պատերազմից հետո Արծրուն Հովհաննիսյանի մասին այնքան Է խոսվել, որ կարծես թե ասելու բան չի մնացել, բայց… Օրերս ծանոթանում էի գործի նյութերին եւ հանդիպեցի հետեւյալ տեղեկատվությանը.

2020թ հոկտեմբերի 19-20-ին ազերիները գրավում են Կովսականը (Զանգելան), դպրոցի շենքի վրա դնում իրենց դրոշը եւ նկարելով գցում համացանց: Դրանից մեկ օր անց՝ հոկտեմբերի 21-ին, մերոնք հրաման են ստանում Կովսականում կատարել մարտական առաջադրանք, սակայն ընկնում են շրջափակման մեջ, 40 անձ սպանվում կամ գերեվարվում է: Դրանից մեկ օր անց՝ հոկտեմբերի 22-ին, Արծրուն Հովհաննիսյանը «Հայլուր» ծրագրի ընթացքում հայտնում է, որ մերոնք ազերիներին կոտորել են Կովսականում, իսկ դրոշը կեղծ է: Հասկանո՞ւմ եք. Կովսականը գրավված, դպրոցի տանիքին դրոշը դրած, մերոնց գործողությունները ձախողված, 40 անձ սպանված կամ գերեվարված, իսկ Արծրունն ասում է՝ չհավատաք. աննախադեպ հաղթանակ ենք գրանցել: Դե իսկ հետո քննիչի մոտ ցուցմունք է տալիս, որ սխալվել է:

44 օր սրանք մեզ կերակրել են էսպիսի կտերով, ու մենք էլ կույր հավերի նման կերել ենք էդ կտերը»,- գրել է Վահան Հովհաննիսյանն ու հարցադրում արել. «Կա՞ր արդյոք Արծրունի գործողություններում պետական դավաճանության հանցակազմ, թե՞ ոչ, դեռ կքննարկենք»։

«Հայկական ժամանակ»-ի հետ զրույցում մեկնաբանելով իր մասին այս գրառումը՝ Արծրուն Հովհաննիսյանն այն որակեց «տգիտություն, փոքր ուղեղով մարդու տրամաբանություն եւ եզրակացություն»՝ հավելելով՝ ռազմական գործից հասկացող, նույնիսկ իր դեմ նման արշավ կազմակերպողները շատ լավ գիտեն, թե ինչ մեխանիզմով էին խոսնակները հաղորդում մարտական գործողություններին առնչվող տեղեկատվությունը։

«Հերթական անգամ, սակայն, ներկայացնեմ իմացողներին եւ չիմացողներին․ պատերազմի ժամանակ՝ լինի հիմա, 44-օրյայի, Ապրիլյան քառօրյայի ժամանակ, ցանկացած լուր խոսնակները, մասնավորապես ես՝ Արծրուն Հովհաննիսյանս, ստացել եմ բացառապես զինված ուժերի ղեկավարությունից, եթե մանավանդ այդ լուրը վերաբերել է որեւէ տեղանունի, դեպքի, անձի, ժամանակի, այսինքն՝ կոնկրետության տարր է պարունակել։ Եվ զինված ուժերի հրահանգով կամ հրամանով՝ գրավոր կամ բանավոր, որեւէ իրադարձության մասին տեղեկատվությունը, անկախ նրանից՝ ե՞րբ է այն տեղի ունեցել՝ մե՞կ օր, թե՞ մի քանի օր առաջ, հաղորդվել է հասարակությանը։

Ինչու եմ ասում տարրական տգիտություն, քանի որ տապալված ռազմական գործողությունների, օպերացիաների վրա հետին թվով հայտնած տեղեկությունները որեւէ բանի մահվան պատճառ չեն կարող լինել։ Ես հետախուզության պետը չեմ եղել, ես օպերացիան մշակողը չեմ եղել, ես կապի վարչության պետը չեմ եղել, ես զորքերի փոխգործակցության օպերատիվ սպա չեմ եղել եւ այսպես կարող եմ էլի թվարկել զինվորական գործից չհասկացողների համար եւս մի 10 գործառույթ, որոնք ուղիղ պատասխանատվություն են կրում այս կամ այն գործողությունը մշակելու, իրականացնելու, պատշաճ իրականացնելու կամ վատ իրականացնելու հետ։

Ավելին ասեմ՝ ամբողջ պատերազմի ընթացքում որեւէ առանձին վերցրած ռազմագործողության պլանավորման եւ իրագործման մանրամասներին մինչեւ տվյալ օպերացիայի իրագործումը չեմ էլ տիրապետել։ Այսինքն՝ ես նույնիսկ չեմ մասնակցել որեւէ տեսակի գործողության պրոցեսինգին, մինչեւ այդ պրոցեսը չի ավարտվել, եւ ինձ չեն հայտնել պրոցեսի արդյունքների մասին՝ լավ կամ վատ»,- նշեց նա:

Ինչ վերաբերում է փաստաբանի այն դիտարկմանը, թե քննիչի մոտ Հովհաննիսյանը ցուցմունք տալիս ասել է, թե սխալվել է, ասաց․ «Ոչ մի քննիչի ես չեմ ասել, որ ես սխալվել եմ։ Այն, ինչ որ ձեզ ասացի, նույնն ասել եմ նաեւ քննիչներին։ Նրանք, բարեբախտաբար, հիմար մարդիկ չեն, եւ շատ լավ սիստեմը հասկանում են, թե ինչպես է այդ ամենը տեղի ունեցել։ Սխալմունք կլինի իմ հայտնածը, թե դիտավորյալ հայտնած, դրանք, նորից եմ կրկնում, բացառապես մշակվել, գեներացվել եւ հաղորդման նյութի տեսք են ստացել ՀՀ զինված ուժերի ղեկավարության կողմից»։

Նշենք, որ 44-օրյա պատերազմի առնչությամբ հարուցված քրեական գործերից մեկի շրջանակներում Ա․ Հովհաննիսյանը, իր հավաստմամբ, վկայի կարգավիճակով մի քանի անգամ հրավիրվել է ԱԱԾ, մեկ-երկու անգամ էլ՝ Քննչական կոմիտե, մասնակցել քննչական գործողությունների։

«Անդադար կարող են լինել նման քննչական գործողություններ՝ տարբեր դրվագների հետ կապված, որոնց առնչությամբ ես՝ որպես վկա, կարող եմ անցնել»,- նկատեց նա:

Վերջինս նաեւ հավելեց, որ չի ճանաչում, երբեւէ չի առնչվել իր մասին վերոհիշյալ գրառումը կատարած փաստաբանի հետ։

«Բայց, նորից եմ կրկնում, այդպիսի պատասխան, որ ես ուղղակի սխալվել եմ, ես չեմ տվել ոչ մեկին եւ չեմ էլ տա, որովհետեւ ես ինֆորմացիայի գեներացման պատասխանատվություն չեմ ունեցել, որ մի բան էլ սխալվեմ կամ չսխալվեմ։ Հաղորդել եմ այն, ինչ ԶՈՒ ղեկավարությունը անհրաժեշտ է գտել, որ պետք է հաղորդվի։ Իսկ թե ինչու է հատկապես վերջին ամիսներին նորից ակտիվացել իմ դեմ արշավը, հասկանալի է»,- նշեց զրուցակիցը:

Արծրուն Հովհանիսյանը, բացելով փակագծերը, նկատեց. «Շատերին հանգիստ չի տալիս այն հանգամանքը, թե ինչով է Արծրունը զբաղվում հենց այս պահին, էն, ինչը որ անում է, եւ էդ արածի արդյունքների համաժողովրդական իրական գնահատականը նույնպես հանգիստ չի տալիս ոմանց։ Ուստի նորից ակտիվացրել են իմ դեմ արշավը»:

Նկատենք, որ Հովհաննիսյանը սեպտեմբերի 13-ի ռազմական ագրեսիայից հետո մեկնել է դիրքեր։ Նա Հայոց բանակին մարտական պինդ ոգի, երկրին էլ խաղաղություն մաղթեց։